Një valë e dytë e koronavirusit do ta përfshijë botën gjatë vitit, me gjasë në vjeshtë. Paralajmërimi vjen nga presidenti i Koresë së Jugut, Moon Jae-In, i cili thotë se, pavarësisht prej përpjekjeve për izolim, përgjatë këtyre muajve SarsCov2 nuk do të ndalet, por mund të rikthehet edhe më i fortë.

“Përhapja me këto ritme e infeksionit, pavarësisht prej stabilizimit të situatës në këtë fazë, rrit dyshimet se mund të rikthehet në çdo çast, në çdo hapësirë të hapur, kudo ku njerëzit po i rikthehen jetës normale. Kjo gjë nuk ka mbaruar derisa të mbarojë vërtet. Derisa alarmi të marrë fund, ne nuk duhet ta ulim nivelin e vigjilencës. Vetëm kështu mund ta frenojmë pandeminë”, tha Moon Jae-in.

Në përvjetorin e tretë të tij në krye të shtetit, presidenti tha se do të duhet kohë derisa kjo situatë të marrë fund: “Do të kalojë një kohë e gjatë përpara se pandemia Covid-19 të përfundojë totalisht. Deri atëherë, duhet të përgatitemi për një valë të dytë, që e parashikojnë edhe ekspertët e fushës”.

Kreu i shtetit paralajmëroi se në vendin e tij masat nuk do të lehtësohen krejtësisht, ndërsa Task Forca e shëndetësisë po përgatitet tashmë për valën e dytë të vjeshtës apo dimrit të këtij viti, duke vijuar trajnimet e të gjithë stafit spitalor për t’u përballur me këtë virus. Koreja e Jugut raportoi këtë të diel 34 raste të reja të të infektuarve, shifra më e lartë në një muaj dhe kjo për shkak të rihapjes së disa bizneseve, mes tyre edhe klubeve të natës, ku një pacient me Covid-19 ka infektuar dhjetëra të tjerë. Tetë prej rasteve ishin të importuara nga jashtë.