Koreja e Veriut ka lëshuar drejt detit dy raketa balistike me rreze të mesme veprimi. Ky ishte testimi i parë i armëve balistike që Veriu ka kryer në dy javët e fundit, teksa ushtria amerikane ka paralajmëruar se përdorimi i mundshëm i armëve bërthamore nga Phenjani do të “rezultonte në fundin e regjimit ” të këtij shteti.

Ushtria e Koresë së Jugut ka thënë se ka detektuar lëshimin e dy raketave nga Veriu në zonën detare afër Tongçon të premten. Ushtria ka bërë me dije se dy raketat kanë fluturuar afër 230 kilometra në një lartësi maksimale prej 24 kilometrash.

Në deklaratë është thënë se Koreja e Jugut dënon fuqishëm këto testime, duke i quajtur “provokime të mëdha” që minojnë paqen rajonale dhe shkelin rezolutat e Këshillit të Sigurimit të Kombeve të Bashkuara që ndalojnë çdo aktivitet balistik nga Koreja e Veriut.

Komanda amerikane në Indo-Paqësor ka thënë se këto testime tregojnë për “ndikimin destabilizues” të armëve bërthamore të Koresë së Veriut dhe të programi balistik të saj. Ndërsa ushtria japoneze ka thënë po ashtu ka detektuar lëshimin e raketave dhe se tani po analizon se çfarë lloje raketash janë përdorur.

Pas lëshimit të raketave, zyrtarët e Ministrisë së Jashtme të Koresë së Jugut, kanë thënë se kanë biseduar me homologët e tyre nga ShBA-ja dhe Japonia. Tri shtetet është thënë se janë pajtuar për të rritur koordinimin për shkak të Koresë së Veriut, teksa i kanë bërë thirrje Veriut që të ndalë testimin e armëve dhe t’i kthehet bisedimeve.

Ky ishte testimi i parë i raketave balistike të Koresë së Veriut që nga 14 tetori, dhe lëshimi i tyre është bërë në ditën e fundit të stërvitjeve vjetore ushtarake të Koresë së Jugut, në të cilat këtë vit marrin pjesë edhe ushtarët amerikanë. Po ashtu, javën e ardhshme, forcat jugkoreane dhe amerikane do të mbajnë stërvitje ushtarake në shkallë të gjerë.

Koreja e Veriut i sheh stërvitjet ushtarake si përgatitje për ta sulmuar atë edhe pse Uashingtoni dhe Seuli thonë se stërvitjet janë të natyrës mbrojtëse.

Që nga shtatori i vitit të kaluar, Koreja e Veriut ka kryer një sërë testimesh, teksa ka thënë se po teston sistemet e armëve bërthamore që janë të dizajnuara për të sulmuar caqe në Korenë e Jugut dhe në ShBA. /REL