Zëvendëskryeministri dhe ministri i Punëve të Jashtme, Shkëmbimit Tregtar dhe Bashkëpunimit e Veprimit Humanitar të Luksemburgut, Xavier Bettel dhe ministrja e Industrisë, Ndërmarrësisë dhe Tregtisë, Rozeta Hajdari, kanë nënshkruar memorandum mirëkuptimi për mbështetjen e sektorit privat.

Memorandumi synon të sjellë projekte të reja që do të fuqizojnë lidhjet ndërmjet Kosovës dhe Luksemburgut.

Zëvendëskryeministri Bettel, ka thënë se si dy vende mike duke të jenë të dobishëm dhe përkrahës. Bettel tha se kjo vizitë e tij, pasqyron përkushtimin e Luksemburgut për të mbështetur Kosovën në rrugën e saj drejt zhvillimit dhe integrimit.

“Kjo është për ta dëshmuar në 25 vjet marrëdhënieve dhe miqësisë që kemi. Miqësi do të thotë të jemi të dobishëm aty ku mundemi. Kjo marrëveshje nuk është diçka e re, të gjitha ndryshojnë tash e 20 vite. Mund të themi se nuk është shpenzim por investim në të ardhmen, për ta parë potencialin”, ka theksuar Bettel.

Ndërsa zëvendëskryeministri i Kosovës, Besnik Bislimi, ka thënë se takimet e tilla tregojnë përkushtimin e thellimit të marrëdhënieve në mes të dy vendeve.

“Takimet dhe bisedat e sotme ishin konfirmim i radhës i përkushtimit tonë për thellimin e marrëdhënieve dhe zgjerimit të mundësive për bashkëpunim në fusha me interes të përbashkët. Dukati i madh i Luksemburgut ka qenë dhe vazhdon të jetë mbështetës i palëkundur i Kosovës në të gjitha proceset tona shtet-ndërtuese. Përmes projekteve të ndryshme financiare Luksemburgu deri më tani ka investuar rreth 100 milionë euro në Republikën e Kosovës, duke kontribuar kështu në zhvillimin dhe progresin tonë ekonomik dhe shoqëror. Sot zëvendëskryeministri Bettel dhe ministrja e MINT, Hajdari sapo nënshkruan memorandumin e mirëkuptimit për dy fonde për mbështetjen e sektorit privat”, ka thënë Bislimi.