Presidenti i Serbisë, Aleksandër Vuçiq, e ka komentuar deklaratën e të dërguarit të posaçëm të Gjermanisë për Ballkanin Perëndimor, Manuel Sarrazin se Kosova e ka mbështetjen e Berlinit për anëtarësim në Këshillin e Evropës.

Vuçiqi ka thënë se dëshiron të heshtë në këtë rast, por s’mundi pa vajtuar sërish.

“Do të filloja, nëse më lejoni, në një mënyrë tjetër t’u drejtohem qytetarëve të Serbisë. Ndonjëherë në këto kohë është më e mençur t’i heshtni disa gjëra”, citojnë mediat serbe të ketë thënë presidenti serb në “TV Prva”.

Vuçiqi komentoi edhe thirrjen e ministrave të G7-ës që i kërkuan Serbisë ta harmonizojë politikën e saj me BE-në. Ai i quajti “politikë pa parime” dhe “presione brutale” disa pjesë të deklaratës së G7-ës, ndërsa nuk u përmbajt duke shprehur mllefin e tij ndaj Gjermanisë.

“Edhe britanikët sillen më korrekt se gjermanët, të paktën nuk do ta përdorin sëpatën menjëherë”, ka thënë Vuçiqi.

Emisari i qeverisë gjermane për Ballkanin Perëndimor, Manuel Sarrazin, ka thënë të shtunën se Kosova është në zemër të Evropës dhe se i përket Këshillit të Evropës, duke theksuar qëndrimin e qartë se Kosova e ka mbështetjen e plotë të Gjermanisë në këtë proces.

Për këtë, ministrja e Punëve të Jashtme e Kosovës, Donika Gërvalla, e ka falënderuar Sarrazin në gjermanisht përmes llogarisë se vet në “Twitter”, duke shpërndarë fjalët e tij.

Danke für die klaren Worte! https://t.co/W5GXdgvIz7

— Donika Gërvalla-Schwarz (@gervallaschwarz) May 14, 2022