Zëvendësministrja e Punëve të Jashtme të Kosovës, Rejhan Vuniqi, po qëndron për një vizitë dyditore në Portugali. 

Në kuadër të kësaj vizite ajo është pritur nga Sekretarja e Shtetit për Çështje Evropiane në Ministrinë e Punëve të Jashtme portugese, Ana Paula Zacarias, bën të ditur MPJ, nëpërmjet një njoftimi.

“Duke e falënderuar nikoqiren e takimit për mbështetjen gjithëpërfshirëse që Republika portugeze i ka dhënë vendit tonë që nga periudha luftës, rindërtimin e paqes nëpërmjet forcave paqëruajtëse portugeze, njohjes së hershme dhe përkrahjes së parezervë për integrimin dhe anëtarësimin e Kosovës në Organizatat Ndërkombëtare e strukturat euro-atlanike dhe me qëllimin e thellimit dhe zgjerimit të bashkëpunimit të mëtutjeshëm bilateral në mes dy vendeve, Zëvendësministrja Vuniqi i ka dorëzuar edhe kërkesën zyrtare për hapjen e Ambasadës së Republikës së Kosovës në kryeqytetin portugez, Lisbonë”, thuhet në njoftimin e MPJ-së.

Sipas këtij njoftimi, qëllimi dhe kërkesa për hapjen e Ambasadës së Kosovës në Lisbonë është mirëpritur dhe vlerësuar e rëndësisë së veçantë nga përfaqësuesit e shtetit pritës në Ministrinë e Punëve të Jashtme, ndërsa është ri-konfirmuar vazhdimi i mbështetjes si në procesin e konsolidimit ndërkombëtar të shtetit të Kosovës ashtu edhe në atë të liberalizimit të vizave për qytetarët e Kosovës si dhe rrugës së integrimit dhe anëtarësimit në strukturat euro-atlantike.

MPJ bën të ditur se të dy bashkëbisedueset, veç tjerash, kanë rënë dakord që të zhvillohen konsultimet politike në mes të dyja vendeve në vjeshtën e këtij viti si dhe të punohet në organizimin e një Forumi Ekonomik në të ardhmen e afërt.

Gjatë ditës, zëvendësministrja Vuniqi është pritur edhe nga Kryesuesja e Komisionit për Çështje Evropiane në Asamblenë portugeze, Regina Bastos.

Vuniqi ka marrë pjesë edhe në aktivitetin kulturor Mini-Dokufest – Lisbonë, ku u shfaqën disa filma kosovarë në Institucionin kulturor portugez, që mbikëqyret nga Ministria e Punëve të Jashtme e Portugalisë -Institutin Camões.

Kjo ngjarje u organizua në bashkëpunim me DokuFestin dhe ku morrën pjesë edhe Drejtorja e Festivalit Nita Deda dhe Drejtori Artistik, Veton Nurkollari.

Në kuadër të kësaj vizite, Vuniqi është shoqëruar nga Ambasadori jo-rezident i Kosovës në Portugali, Qëndrim Gashi.