Ministria e Punëve të Jashtme dhe Diasporës, Zyra Ndërlidhëse e Kosovës në Serbi, ka kërkuar nga autoritetet serbe konfirmimin e identitetit të personit të vrarë sot.

Lajmi është bërë me dije përmes një postimi të MPJ-së në “Facebook”.

“Ministria e Punëve të Jashtme dhe Diasporës, Zyra Ndërlidhëse e Republikës së Kosovës në Serbi pas raportimeve për vrasjen e një shtetasi të Republikës së Kosovës në Serbi, ka kërkuar nga autoritetet serbe që të konfirmojnë identitetin e personit të vrarë. Ministria e Punëve të Jashtme dhe Diasporës do t’ju mbajë të informuar sapo të ketë informacione të reja në lidhje me këtë rast”, është thënë në njoftim.

Ndryshe, mediat në Serbi kanë raportuar para pak orësh se forcat e policisë atje kanë vrarë Faton Hajrizin, të dyshuarin për vrasjen e një polici dhe plagosjen e një tjetri të enjten në Loznicë.