Përfaqësuesja e Kosovës ka shënuar fitore të rëndësishme në Kampionatin Evropian U19 për hendbolliste që po mbahet në Prishtinë. Të hënën mbrëma, vajzat “dardane” fituan ndaj Britanisë së Madhe me rezultat 28:21.

Fitorja erdhi pas dy disfatave, ndërsa do të shërbejë për të rritur besimin në Kombëtare për vazhdimin e Evropianit.

Fillimi i ndeshjes ishte i barabartë, ndërsa më pas Përfaqësuesja e Kosovës nisi shkëputjen në rezultat. Pas pjesës së parë rezultati ishte 13:11 në të mirë të Kosovës.

Në pjesën e dytë Kombëtarja jonë vazhdimisht ishte në epërsi. Britania e Madhe u afrua në 20:19, por pasoi shkëputje tjetër.

Portierja Selvije Mullakadrija i bëri 11 pritje. Ariona Dushica e Arona Krasniqi i shënuan nga tetë gola, ndërsa katër i shënoi Elisa Mirdita. Të enjten Kosova luan me Finlandën.