Kosova nënshkruan marrëveshje për kredi 100 milionë euro nga BE-ja
Ministria e Financave dhe Banka Qendrore e Kosovës kanë nënshkruar Marrëveshjen e Kredisë për Asistencën Makro-Financiare me Bashkimin Evropian, në vlerë prej 100 milionë euro.
Ministria e Financave ka njoftuar se kjo marrëveshje do t’i hapë mundësinë e përfitimit të skemës së BE-së për Ballkanin Perëndimor “Marrëveshja është nënshkruar nga ministrja e Financave Hykmete Bajrami, zëvendës guvernatori i Bankës Qendrore të Kosovës Sokol Havolli, dhe nga ana e Bashkimit Evropian është nënshkruar nga komisioneri për Ekonomi Paolo Gentiloni. Kjo Marrëveshje ka ardhur si rezultat i hapjes së mundësisë së përfitimit nga kjo skemë e Bashkimit Evropian edhe për vendet e Ballkanit Perëndimor. Ndihma makro-financiare jepet në ndërlidhje me ndihmën nga Fondi Monetar Ndërkombëtar, i cili në prill të vitit 2020 miratoi Instrumentin e Financimit të Shpejtë për Kosovën, në vlerë prej 51.6 milionë EUR”, thuhet në komunikatën e MF-së
Sipas Ministrisë së Financave, kjo kredi do të ndihmojë në Planin për Rimëkëmbjen Ekonomike
“Kjo kredi do të ndihmojë në Planin për Rimëkëmbje Ekonomike dhe në zbatimin e masave emergjente. Një pjesë e disbursimit varet nga plotësimi i disa kritereve të cilat Qeveria e Kosovës është zotuar që ti realizojë me përpikëri pasi që të njëjtat i ndihmojnë përmirësimit të Administratës Publike në Kosovë dhe rritjes së Transparencës”, thuhet në komunikatë.
(M.K / Epoka e re)
