Kosova përfiton edhe 3 milionë dollarë nga ShBA-ja

29 shtator 2021 | 13:33

Presidentja e Republikës së Kosovës, Vjosa Osmani dhe drejtoresha e USAID-it në Kosovë, Zeinah Salahi, kanë nënshkruar të mërkurën amendamentin 3 të Marrëveshjes së grantit për objektivat zhvillimore me Shtetet e Bashkuara të Amerikës (ShBA), me të cilin Republika e Kosovës përfiton edhe 3 milionë dollarë shtesë, duke rritur grantin total në mbi 41 milionë dollarë.

Me këtë marrëveshje synohet shërbimi më i mirë ndaj qytetarëve nga institucionet  llogaridhënëse dhe efektive të qeverisjes, si dhe rritja e mundësive për pjesëmarrje gjithëpërfshirëse demokratike dhe ekonomike. Gjithashtu, me të synohet përmirësimi dhe bashkëpunimi ndërmjet qytetarëve, shoqërisë civile, bizneseve dhe sektorit publik në mënyrë që komunitetet lokale të kenë pozicion më të favorshëm për t`i adresuar sfidat zhvillimore të Kosovës.

Kjo marrëveshje fillimisht ishte nënshkruar nga presidentja Osmani në nëntor të vitit 2020, me të cilën Republika e Kosovës ka përfituar 33 milionë dollarë nga USAID-i.  Në maj të këtij viti është nënshkruar amendamenti 1 i marrëveshjes, i cili i siguron Republikës së Kosovës një shtesë të mjeteve financiare në shumën prej 1.6 milion dollarë amerikan.

Përmes amendamentit 2 të kësaj marrëveshjeje, Republika e Kosovës ka përfituar edhe 3.8 milionë dollarë shtesë, kurse të mërkurën është nënshkruar edhe amendamenti i tretë i marrëveshjes, përmes së cilit Republika e Kosovës përfiton edhe 3 milionë dollarë. Në total, përmes kësaj marrëveshjeje, Republika e Kosovës përfitoi mbi 41 milionë dollarë amerikan nga Shtetet e Bashkuara të Amerikës.

Lajme të sponsorizuara

Të fundit
Manny Pacquiao ka njoftuar se po tërhiqet nga boksi për…