Presidenti i Kosovës, Hashim Thaçi, ka vendosur që më 19 maj të këtij viti t’i shpallë zgjedhjet e jashtëzakonshme lokale në katër komunat veriore me shumicë serbe: Mitrovicë e Veriut, Leposaviq, Zubin Potok dhe Zveçan.

Ndërkohë, për këto zgjedhje, Komisioni Qendror i Zgjedhjeve (KQZ) po kërkon buxhet shtesë nga Qeveria.

Kryetarja e KQZ-së, Valdete Daka, ka thënë për “Zërin” se brenda pak ditëve do t’i kërkojnë këto të holla, për të vazhduar më pas me hapat e tjerë.

“Shpresoj që brenda pak ditëve do t’i ndërmarrim hapat për fillimin e organizimit të zgjedhjeve dhe do t’i drejtohemi së pari Qeverisë për një buxhet shtesë për këto zgjedhje, pastaj do të vazhdojmë sipas radhës me hapat tjerë të cilët janë paraparë për organizim të zgjedhjeve të jashtëzakonshme”, ka thënë Daka.