559 aplikacione i ka pranuar Komisioni Qendror i Zgjedhjeve (KQZ) nga qytetarët që jetojnë në diasporë për zgjedhjet e 17 tetorit.

KQZ-ja deri më tani i ka aprovuar 523 aplikacione ndërsa 36 të tjera janë refuzuar.

Shtetasit e Kosovës që jetojnë dhe punojnë në diasporë që duan të votojnë në zgjedhjet lokale kanë të drejtë të regjistrohen deri më datën 18 gusht.

Kështu ka bërë me dije për “Klankosova.tv” zëdhënësi i Komisioni Qendror i Zgjedhjeve (KQZ), Valmir Elezi.

“Periudha e aplikimit për t’u regjistruar si votues jashtë Kosovës, e cila ka filluar më 10 korrik, është duke vijuar. Kjo periudhë përfundon më 18 gusht”.

“Sipas të dhënave të fundit, deri më 13 korrik, kemi pranuar 559 aplikacione për regjistrim. Pas shqyrtimit të tyre nga shërbimi votues janë aprovuar 523 aplikacione, ndërsa 36 të tjera jo”, ka thënë Elezi.

Elezi ka theksuar se ata që arrijnë të regjistrohen suksesshëm do të mund të votojnë nga 15 shtatori.

Më tutje, Elezi ka thënë se fletvotimet duhet të arrijnë në adresë të KQZ-së deri më 15 tetor.

“Të gjithë personat që arrijnë të regjistrohen suksesshëm si votues jashtë Kosovës do të mundet të votojnë në një fazë të mëvonshme përmes postës, e cila fillon më 15 shtator, ndërsa fletëvotimet në adresë të KQZ-së duhet të arrijnë deri më 15 tetor”, ka thënë Elezi.