Komisioni Qendror i Zgjedhjeve (KQZ) ka shpallur rezultatet preliminare për raundin e dytë të zgjedhjeve lokale në Kosovë që u mbajtën më 14 nëntor.

Sipas rezultateve preliminare, Partia Demokratike e Kosovës fitoi Komunën e Prizrenit me kandidatin Shaqir Totaj, Drenasin me Ramiz Lladrovcin, Dragashin me Shaban Shabanin, Kaçanikun me Besim Ilazin dhe Vushtrrinë me Ferit Idrizin.

Lidhja Demokratike e Kosovës ka fituar në Prishtinë me Përparim Ramën, në Istog me Ilir Feratin, në Fushë Kosovë me kandidatin Burim Berisha, në Junik me Ruzhdi Shehun dhe në Viti me Sokol Halitin.

Aleanca për Ardhmërinë e Kosovës fitoi udhëheqësinënë Gjakovë me Ardian Gjinin, Klinën me Zenun Elezajn dhe Rahovecin me Smajl Latifin.

Lëvizja Vetëvendosje ka fituar në komunën e Kamenicës me kandidatin Kadri Rahimaj, në Podujevë me Shpejtim Bulliqin, në Shtime me Qemajl Aliun dhe në Gjilan me Alban Hysenin.

Ndërkaq Nisma Social Demokrate arriti fitore në Malishevë me Ekrem Kastratin.

Në komunën e Obiliqit zgjedhjet në rundin e dytë i fitoi Xhafer Gashi nga Iniciativa Qytetare për Obiliqin.

Në komunën e Mamushës fitore arriti Abdulhadi Krasniq nga KDTP. Ndërkaq në komunën e Kllokotit balotazhin e fitoi Vladan Bogdanoviq nga Lista Serbe.

Deri në orën 19:00, përkatësisht deri në mbylljen e vendvotimeve, në rundin e dytë të zgjedhjeve lokale në Kosovë kanë votuar rreth 38 për qind të votuesve.

Pas shpalljes së rezultateve preliminare, në ditët në vazhdim pritet numërimi edhe i votave me kusht dhe votave që kanë ardhur prej jashtë vendit.

Rundi i parë i zgjedhjeve të rregullta lokale u mbajt më 17 tetor dhe qytetarët votuan për asambletë komunale dhe kryetarët e komunave. Në këtë raund, nga 38 komuna sa janë në Kosovë, 17 zgjodhën krerët e rinj.