Në Klinikën Infektive të QKUK-së janë të hospitalizuar 59 pacientë me Covid-19, prej të cilëve dy janë në gjendje të rëndë shëndetësore.

Infektologu Valbon Krasniqi, ka thënë se gjatë dhjetë ditëve të fundit është rritur numri i të shtrirëve edhe në Klinikën Infektive

“Sot në Klinikën Infektive kemi të shtrirë 59 pacientë me Covid-19. Prej tyre 22 janë me oksigjenoterapi në gjendje të rëndë dhe dy pacientë të tjerë janë të shtrirë në repartin intensiv në gjendje shumë kritike”, ka thënë ai për “TV Dukagjinin”.

Infektologu Krasniqi ka thënë se është shumë shqetësues fakti që familjarët që kanë persona në Klinikën Infektive janë duke qëndruar lirshëm në klinikë dhe janë duke iu sjellë gjëra familjarëve të tyre.

“Të njëjtit më pas mund të dalin në qytet. Nëse qytetarët vazhdojnë të qarkullojnë të lirë dhe pa maska mund të ketë edhe më shumë rritje të rasteve”, ka thënë Krasniqi, duke shtuar se për momentin në Kosovë janë rreth 700 raste aktive dhe se mund të ketë edhe qindra raste tjera të kontaktit që në të ardhmen mund të rrezikojnë kapacitetet tona shëndetësore.

“Klinika Infektive ka në dispozicion 126 shtretër, mirëpo gjatë kësaj jave jemi në përgatitje edhe të Klinikës së Pulmologjisë dhe Dermatologjisë për të shtuar kapacitetet në rast se kalohen kapacitetet e Klinikës Infektive. Pra me këto zgjerime kemi gjithsejtë rreth 250 shtretër në dispozicion”, ka thënë Krasniqi.