Kryetari i Partisë Demokratike të Kosovës (PDK), Memli Krasniqi, ka vazhduar fushatën e fakteve interesante për Pavarësinë, duke prezantuar tek ndjekësit e tij kreatorin e flamurit të Kosovës, Muhamer Ibrahimin – Trimin.

Në një video të shpërndarë në “Facebook”, Krasniqi ka treguar se Ibrahimi po ashtu ka qenë ushtar i UÇK-së.

“A e dini që Trimi ka qenë edhe ushtar i Ushtrisë Çlirimtare të Kosovës? Trimi ka shërbyer në Njësinë TF-0 në Zonën e Pashtrikut. Simbolikë e jashtëzakonshme apo jo? Trim, ky po që është fat i madh dhe nder i dyfishtë, edhe me qenë ushtar i lirisë, edhe me dizajnuar flamurin e shtetit tënd”, i ka thënë Krasniqi, Trimit.

Më pas në videoklip ka folur kreatori i flamurit, i cili ka thënë se të qenit ushtar dhe kreator i flamurit, janë dy momentet më krenare të jetës së tij.

“Patjetër kryetar, ndoshta as në ëndrrat ma të mira të mia e as në imagjinatën më të mirë timen. Këto dy momente pa dyshim që shënojnë periudhën më krenare të jetës time!”, ka thënë Trimi.