Kryetari i Partisë Demokratike të Kosovës, Memli Krasniqi, ka takuar sot drejtoreshën për Ballkanin Perëndimor në Ministrinë e Jashtme të Gjermanisë, Susanne Schütz dhe ambasadorin gjerman në Kosovë, Jörg Rohde, me të cilët ka diskutuar për nevojën e një perspektive të qartë euroatlantike për Kosovën.

Në profilin e tij në “Facebook”, ai ka shkruar se BE-ja sa më parë duhet ta përmbushë premtimin karshi qytetarëve të Kosovës.

“Me Drejtoreshën për Ballkanin Perëndimor në Ministrinë e Jashtme të Gjermanisë, Susanne Schütz, dhe me Ambasadorin Jörg Rohde, folëm sot për nevojën e një perspektive të qartë euroatlantike për Kosovën, dhe u pajtuam se për këtë duhet një përpjekje e shtuar nga të gjithë.  Gjermania është mbështetëse për liberalizimin e vizave për Kosovën dhe ne i jemi mirënjohës. Por, BE sa më parë duhet ta përmbushë premtimin karshi qytetarëve tanë. Kosova beson në vlerat evropiane dhe integrimi në BE është alternativa jonë e vetme. Ne jemi të lumtur dhe krenarë që në rrugën tonë të shtetformimit, zhvillimit dhe integrimit kemi një aleat të rëndësishëm si Gjermania”, ka shkruar Krasniqi.