Presidenti i KOK-ut, Ismet Krasniqi ka pritur sot udhëheqësin e Zyrës Ndërlidhëse të Kinës në Prishtinë, Cheng Lei.

Presidenti Krasniqi, që shoqërohej nga anëtari i Bordit Ekzekutiv, Jeton Beqiri, njëherit kryetar i Federatës së Pingpongut të Kosovës, falënderoi mysafirin Lei për vizitën, derisa e njoftojë me sfidat dhe sukseset e sportit tonë, me theks të veçantë medaljet e arta olimpike, si dhe pjesëmarrjen tonë të fundit në Lojërat Olimpike Dimërore, të mbajtura në Pekin të Kinës vitin e kaluar.

Presidenti Krasniqi kërkoi nga Lei që përmes Zyrës së tyre, KOK-u dhe Komiteti Olimpik i Kinës të lidhin bashkëpunim në fushën e sportit, për çka u pajtuan të dyja palët që në javët dhe muajt në vijim të bashkëpunojnë për detaje të mëtutjeshme.

Udhëheqësi i Zyrës Ndërlidhëse të Kinës në Prishtinë, Lei, duke përgëzuar presidentin Krasniqi për sukseset, u shpreh i gatshëm për të thelluar bashkëpunimin me KOK-un dhe lëvizjen olimpike në vend, në mënyrë që sporti të shërbejë si urë lidhëse për bashkëpunim mes dy vendeve.

Temë diskutimi ishte edhe suksesi i anëtarit të BE të KOK-ut, Jeton Beqiri, i cili ditë më parë ndau drejtësinë në njërën nga finalet e Lojërave Verore të Univerziadës Botërore, të mbajtura në Chengdu të Kinës.

Në fund të takimit, të dyja palët shkëmbyen dhurata mes vete.