![](https://www.epokaere.com/wp-content/uploads/2023/02/memli-1.jpg)
Krasniqi: Kosova humbi njohjen dhe fitoi asociacionin
Kryetari i PDK-së, Memli Krasniqi, ka reaguar pas pajtimit në Bruksel mes Kurtit e Vuçiqit për zbatimin e të gjitha marrëveshjeve në dialog përmes planit franko-gjerman.
“Ajo që kishim paralajmëruar edhe ndodhi. Kushtet dhe qëndrimet u shkrinë para interesave personale dhe ambicieve për pushtet të kryeministrit Kurti. Kosova humbi njohjen dhe fitoi asociacionin. Duhet thënë zëshëm dhe qartë: tashmë është edhe zyrtarisht evidente se propozimi evropian nuk parasheh njohjen e ndërsjellë, si kriter kryesor për normalizimin e marrëdhënieve në mes të Kosovës dhe Serbisë dhe hapjen e perspektivës evropiane për shtetit tonë”, ka shkruar Krasniqi në “Facebook”.
Sipas tij, aty nuk flitet për njohjen nga pesë vendet mos-njohëse të BE-së, nuk flitet për hapjen e rrugës drejt anëtarësimit në NATO, as për marrjen e statusit kandidat për anëtarësim në BE.
“Për dy vjet me radhë, ne e kemi mbështetur Kryeministrin Kurti në raport me Serbinë. E kemi inkurajuar që të koordinohet me aleatët tanë ndërkombëtarë dhe i kemi ofruar edhe propozime konkrete në lidhje me marrëveshjen finale me njohjen e ndërsjellë në qendër. Duke e injoruar çdo ndihmë e këshillë që ka ardhur nga ne, kokë në vete dhe në kundërshtim me interesat afatgjate të Republikës së Kosovës, kryeministri Kurti, përmes veprimeve dhe politikave të gabuara, degradoi pakthyeshëm procesin e dialogut. Rrjedhimisht, ai mundësoi heqjen e marrëveshjes finale me njohjen e ndërsjellë në qendër dhe i solli vendit një marrëveshje të përkohshme me asociacionin në qendër”, ka theksuar Krasniqi, duke shtuar se krahas rritjes enorme të emigrimit si pasojë e keqqeverisjes, kryeministri Kurti sonte tkurri edhe sovranitetin e shtetit tonë.
“Prandaj, 27 shkurti i vitit 2023, për Kosovën, me kryeministër Albin Kurtin, shënon një mundësi të humbur për shtetin tonë që ta përmbyllë përgjithmonë konfliktin e ngrirë me Serbinë”, ka thënë lideri i PDK-së, Memli Krasniqi.