Kryetari i Partisë Demokratike tē Kosovës, Memli Krasniqi, ka përkujtuar sot në pesë vjetorin e vdekjes, ish-kryeministrin Bajram Rexhepi.

Krasniqi ka shkruar në faqen e tij në Facebook se për gjeneratën e re të aktivistëve e politikanëve, Bajram Rexhepi ishte modeli i politikanit që gjithë përgatitjen e tij profesionale e personale e vuri në shërbim të atdheut.

“Doktor Bajrami, si mjek atdhetar që ishte afër ushtarëve të plagosur të UÇK-së gjatë luftës, politikan i respektuar që udhëhoqi Kosovën në një periudhë sfiduese të pas-luftës, një personalitet unifikues që shtroi rrugën e dialogut dhe bashkëpunimit ndër-partiak, mbi të gjitha, lider i përgjegjshëm e parimor – ishte shembull për tu ndjekur”, ka shkruar Krasniqi.

Postimi i plotë i Krasniqit, pa ndërhyrje:

Pesë vite më parë, më 21 gusht të vitit 2017, iku në amshim, miku im, ish-kryeministri, dr. Bajram Rexhepi.

Për ne, gjeneratën e re të aktivistëve e politikanëve, dr. Bajram Rexhepi ishte modeli i politikanit që gjithë përgatitjen e tij profesionale e personale e vuri në shërbim të Atdheut.

Doktor Bajrami, si mjek atdhetar që ishte afër ushtarëve të plagosur të UÇK-së gjatë luftës, politikan i respektuar që udhëhoqi Kosovën në një periudhë sfiduese të pas-luftës, një personalitet unifikues që shtroi rrugën e dialogut dhe bashkëpunimit ndër-partiak, mbi të gjitha, lider i përgjegjshëm e parimor – ishte shembull për tu ndjekur.

Trashëgimia politike dhe atdhetare e dr. Bajram Rexhepit, në të gjitha vitet e tij në shërbim ndaj vendit, si Mjek, Kryeministër, Kryetar i Komunës dhe Ministër i Punëve të Brendshme, kanë vetëm një emërues të përbashkët: shërbim ndaj qytetarëve!

Të tillë, të përkushtuar dhe të drejtë, do ta kujtojmë përherë njeriun tonë të mirë, familjarin e dashur e politikanin e vendosur.

Përjetësisht në mendjet dhe zemrat tona, Doktor!