Ermal Krasniqi ka paralajmëruar Rumaninë se nuk duhet nënvlerësuar Kosovën. Ekipet kombëtare të këtyre dy shteteve janë pjesë e Grupit I kualifikues për Kampionatin Evropian “Euro 2024”.

Cikli kualifikues për Evropianin fillon këtë javë, teksa Kosova dhe Rumania nuk do të përballen mes vete deri në qershor të këtij viti. Krasniqi, i cili po shkëlqen me fanellën e gjigantit rumun, Cluj, por nuk mori ftesë nga Alain Giresse, ka dhënë së fundmi një intervistë për “ProSport.ro”.

24-vjeçari paralajmëroi rumunët se nuk duhet të shpërfillin përfaqësuesen e shtetit të tij vetëm sepse ka një popullsi 10 herë më të vogël se Rumania.

“Kosova është një vend i vogël, por ka shumë talentë që performojnë çdo ditë në ligat më të forta në Evropë. Ka lojtarë të mirë në Kosovë që mund të garojnë në kampionatet evropiane”, ka thënë fillimisht ish-futbollisti i Ballkanit. “Ballkani, ish-klubi im, luajti kundër CFR [Cluj] dhe mendoj se të gjithë e vunë re se çfarë lojtarësh janë atje. Nuk është puna ime të jap rekomandime, por në Kosovë ka lojtarë të mirë që mund të garojnë në kampionatet evropiane. Mendoj se të dyja janë ekipe cilësore, por dëshira ime është që Kosova të fitojë”, ka deklaruar Krasniqi.

Kosova ciklin kualifikues për “Euro 2024” e nis me ndeshjen në udhëtim kundër Izraelit, më 25 mars, kurse pas tre ditësh e pret Andorrën. Kurse, Rumania më 25 mars luan në udhëtim kundër Andorrës, kurse pas tre ditësh e pret Bjellorusinë.