Në kuadër të aktiviteteve shtetërore në shënim të 26-vjetorit të Epopesë së UÇK-së, krerët e shtetit sot do të bëjnë homazhe në Kompleksin Memorial “Adem Jashari”.

“Në orën 10:00, Presidentja e Republikës së Kosovës, Vjosa Osmani së bashku me kryetarin e Kuvendit, Glauk Konjufca dhe me kryeministrin, Albin Kurti bëjnë homazhe në Kompleksin Memorial Adem Jashari në Prekaz, me rastin e 26 vjetorit të Epopesë së UÇK-së”, thuhet në njoftimin për media.

Të martën Prekazi u vizitua nga shumë qytetarë të ardhur nga të gjitha viset shqiptare, kurse në Kuvendin e Kosovës është mbajtur seancë solemne për Epopenë e UÇK-së.

Gjithashtu, një manifestim është mbajtur në kazermën ‘Adem Jashari’ në Prishtinë.

Në të gjitha aktivitetet u vlerësua lart sakrifica e familjes Jashari për lirinë e Kosovës.