Situata kritike politike pritet të marrë një kthesë të re me vizitën e zëvendësndihmëssekretarit amerikan të Shtetit, Matthew Palmer, i cili do të mbërrijë në Tiranë në fillim të javës, në kuadër të një turi ballkanik.

Pas përpjekjeve pa rezultat të evropianëve, në lojë futet diplomacia amerikane, e cila zbarkon në Shqipëri në një kohë që opozita ka djegur mandatet dhe ka nisur protestat e pandalshme, ndërsa mazhoranca po përgatitet për zgjedhje.

Takimin e parë zyrtari amerikan do e ketë me kryeministrin Edi Rama të hënën, ndërsa të martën e 9 prillit, pritet të takohet me presidentin Ilir Meta. Në të njëjtën ditë, Palmeri do zhvillojë një bisedë me kryetarin e Partisë Demokratike, Lulzim Basha dhe drejtuesen e LSI-së, Monika Kryemadhi.

Pas takimeve me zyrtarët e lartë, mësohet se Matthew Palmer do të ketë një takim edhe me një grup gazetarësh shqiptarë.

Një ditë para vizitës së të dërguarit të Shteteve të Bashkuara të Amerikës, presidenti Ilir Meta, ka bërë thirrje për dialog.

“Unë besoj vetëm te zgjidhja politike përmes një dialogu të përgjegjshëm dhe real për të rivendosur normalitetin e plotë kushtetues, institucional dhe demokratik të vendit. I nxis e i inkurajoj të gjithë politikanët e përgjegjshëm kudo ku ata ndodhen, në mazhorancë apo në opozitë, të tregojnë që këto 22 vite nuk mund të shkojnë dëm për hir të kokëfortësive dhe të demonstrimeve të forcës përmes mitingjeve, dhe antimitingjeve të panevojshme”, ka thënë Meta.

Vizitës së Palmer i paraprinë vizita e zyrtarit të Departamentit Amerikan të Shtetit, Jonanathan Moore, i cili ka zhvilluar disa takime, ndërsa publike për mediet ishte bërë vetëm takimi i deputetes të Partisë Demokratike, Rudina Hajdari dhe ish-kryeministrit Sali Berisha.

Vizita e diplomatit amerikan duket si një “dejavu” e dy viteve më parë, kur krizës politike i pati dhënë zgjidhje zëvendësndihmëssekretari Amerikan i Shtetit, Hoyt Bryan Yee, ndërsa mbetet për t’u parë nëse Palmeri do të marrë rolin e negociatorit mes palëve.

Megjithatë ndikimi i Matthew Palmer u duk që në fillimet e krizës. Një ditë para se deputetët e opozitës të linin mandatet, Palmer ka zhvilluar dy biseda telefonike me liderët e opozitës Bashën dhe Kryemadhin, ndërsa pas komunikimit me zyrtarin amerikan, edhe pse opozita nuk është tërhequr nga akti ekstrem, protesta e saj ka rezultuar e qetë dhe pa akte dhune, ndryshe nga ajo e 16 shkurtit.