Kroacia do të rikthejë shërbimin e detyrueshëm ushtarak, i cili do të zgjasë dy muaj, duke filluar nga 1 janari i vitit të ardhshëm, ka njoftuar ministri i Mbrojtjes, Ivan Anusic.

Lëvizja vjen në mes të tensioneve të rritura në Evropë pas agresionit rus në Ukrainë. Ky vendim shënon një rikthim në rekrutim, i cili u pezullua në vitin 2008 kur vendi kaloi në një sistem të bazuar në vullnetarë.

“Ne rritëm pagat e ushtarëve, nënoficerëve dhe oficerëve, të drejtat e tyre materiale jo vetëm përmes të ardhurave personale, por edhe përmes pagave ditore dhe gjithçkaje që u takon. Modernizimi dhe pajisja e Forcave të Armatosura po ecën sipas planit dhe në përputhje me marrëveshjen me aleatët tanë dhe udhëheqjen e NATO-s”, ka thënë ministri Anusic  për transmetuesin kroat “RTL”.

Vende të tjera në Evropë po shqyrtojnë masa të ngjashme ose kanë rikthyer shërbimin e detyrueshëm ushtarak në përgjigje të tensioneve të rritura rajonale.

Vitin e kaluar, Letonia riktheu rekrutimin ushtarak në përgjigje të kërcënimit të paraqitur nga pushtimi i plotë i Ukrainës nga Rusia.