Kompania Rajonale e Ujësjellësit “Prishtina”, përkatësisht Departamenti për Konsumatorë njofton të gjithë konsumatorët në qytetin e Prishtinës se duke filluar nga dita e mërkurë, 18 korrik 2018 dhe duke vazhduar deri më 1 shtator 2018, do e zgjasë orarin e punës në pikat e shitjes, arkat për pagesa të shërbimeve edhe për dy orë të tjera.

Kështu që orari i punës nga dita e hënë deri të premten do të jetë nga ora 08:00-18:00, ndërsa ditën e shtunë do të punohet nga ora 09:00-16:00.

“Arsyeja e zgjatjes së orarit të punës në këtë departament është ofrimi i shërbimeve cilësore për bashkatdhetarët tanë, derisa janë duke pushuar në Republikën e Kosovës. Diaspora përbën një element shumë të rëndësishëm në Republikën e Kosovës dhe kjo për shumë arsye, ekonomike, sociale dhe kulturore, duke u fokusuar në rolin e saj kontributdhënës që nga vitet e ’60-ta e deri në ditët e sotme të lirisë”, thuhet në njoftimin e KRU “Prishtina”.

Përveç pagesave që mund të bëjnë në pikat e shitjes, atyre u ofrohen edhe shërbime të tjera si, ankesa, kërkesa, lexim të ujëmatësve, etj.

Në fund, KRU “Prishtina” fton secilin konsumator që të jenë sa më të rregullt në kryerjen e obligimeve financiare, sepse vetëm në këtë mënyrë mund t’u shmangen ndëshkimeve të kompanisë, gjegjësisht shkyçjes nga shërbimet.