Sekretari i Shtetit për Punë të Jashtme i Britanisë së Madhe, David Lammy kërkoi që qeveria e re e Kosovës të formohet shpejt, ndërsa ka thënë se kjo “është esenciale në këto momente sfiduese”.

Ai ka thënë pas takimit me presidenten Vjosa Osmani se Britania e Madhe është “mike dhe partnere kyçe” e Kosovës, ndërsa ka shtuar se “janë disa gjëra që duam t’i shohim me rastin e zhvillimit të këtij partneriteti”.

“Duam normalizim të qëndrueshëm dhe paqësor për ju këtu në Kosovë, mes Kosovës dhe Serbisë”, ka thënë ai.

Lammy e ka përmendur dialogun Kosovë-Serbi si një çështje në të cilën tha se qeveria e ardhshme duhet të angazhohet fuqishëm.

“Shpresoj që qeveria e ardhshme do t’i adresojë nevojat e të gjithë qytetarëve, duke përfshirë progresin në integrimin e serbëve të Kosovës dhe angazhimin e fuqishëm në dialogun e udhëhequr nga Bashkimi Evropian”, ka thënë Lammy.