Sekretari i Jashtëm i Mbretërisë së Bashkuar, David Lammy, ka përmbledhur shkurtimisht vizitën e tij në Kosovë.

Ai në një postim në platformën “X” ka thënë se është krenar për historinë e qeverisë së tij për mbrojtjen e sovranitetit dhe pavarësisë së Kosovës.

“Është e mrekullueshme të jem sërish në Kosovë. Kjo qeveri është krenare për historinë tonë të mbrojtjes së sovranitetit dhe pavarësisë së Kosovës”, ka shkruar Lammy.

Gjatë konferencës së përbashkët për media me presidenten Vjosa Osmani, Lammy kishte përmendur edhe bashkëpartiakun e tij nga Partia Laburiste, Tony Blair, i cili kishte rol kyç për Kosovën gjatë luftës.

Lammy ka thënë se Ballkani është rajon që ka rëndësi për Britaninë sot, ashtu siç kishte kur Blair ishte kryeministër.

“Mbretëria e Bashkuar do të vazhdojë të luajë rolin e mikes dhe partneres kyç të Kosovës”, ka thënë kryediplomati britanik.