Gjendja aktuale e sigurisë, përgatitja dhe shtimi i masave të përgjithshme të sigurisë për sezonin veror dhe pritjen e fluksit të mërgimtarëve, ishin disa nga temat e që janë diskutuar në takimin punues që kryeministri i Kosovës, Ramush Haradinaj e ka zhvilluar me përfaqësuesit kryesor nga institucionet e sigurisë dhe rendit në vend.

Në këtë takim, kryeministri Haradinaj ka thënë se roli i institucioneve të sigurisë, Policisë së Kosovës dhe mekanizmave të tjerë relevant në luftën kundër dukurive negative është shumë i rëndësishëm dhe pikërisht për këtë, duhet një mobilizim i të gjithëve që të mos ketë trend rritjeje të akteve delikuente dhe kriminale.

“Jemi shumë të përkushtuar që ta rrisim luftën kundër dukurive negative, me theks të veçantë luftën kundër narkotikëve në shkolla dhe afër tyre, dhe për këtë është e nevojshme shtimi i masave nga organet e rendit dhe të sigurisë”, ka thënë Haradinaj.

Po ashtu, kryeministri Haradinaj ka thënë se edhe numri i vetëvrasjeve në Kosovë dhe i aksidenteve në trafik është tepër shqetësues, duke vlerësuar se duhet parë nga afër cilat janë shkaktarët e këtyre dukurive negative si dhe mundësinë e uljes së numrit të aksidenteve në trafik.

Ndërsa, ministri i Punëve të Brendshme (MPB), Bejtush Gashi, ka vlerësuar se situata e përgjithshme e sigurisë në Kosovë është stabile dhe se institucionet e rendit dhe të sigurisë që janë në kompetencë të kësaj ministrie janë duke punuar në përmirësimin e këtyre parametrave.

Edhe ushtruesi i detyrës së drejtorit të përgjithshëm të Policisë së Kosovës, Naim Rexha, ka falënderuar kryeministrin për angazhimin e tij për temat që kanë të bëjnë me rendin dhe sigurinë.

Ai ka thënë se është rritur dukshëm përgjegjësia dhe angazhimi i Policisë Kosovës në krijimin e një ambienti të sigurt për qytetarët.

Në këtë takim pune, të thirrur nga kryeministri Haradinaj është dakorduar që të gjitha institucionet sigurisë të ngritin nivelin e përgjegjësisë me qëllim të krijimit të një ambienti më të sigurt për qytetarët e Kosovës, e që do të reflektonte edhe në krijimin e sigurisë më të madhe për investitorët e huaj potencialë.

/Epoka e re/