Kryeministri Ramush Haradinaj është takuar me ambasadorin britanik, Ruairi O’Connell, me të cilin ka diskutuar për situatën politike në vend dhe progresin substancial që Kosova ka shënuar në rend e ligj.

“Shpreha edhe njëherë përkushtimin e Qeverisë për të fuqizuar angazhimin dhe bashkëpunimin me Britaninë e Madhe në të gjitha fushat e interesit tonë të përbashkët”, ka thënë Haradinaj pas takimit.

Kryeministri është takuar edhe me ambasadoren e Kroacisë në Kosovë, Marija Kapitanovic, për të diskutuar mbi çështjet e rëndësishme politike për vendin dhe rajonin.

“Takimi i Berlinit, ai i Parisit dhe takime të tjera regjionale, janë rast i mirë i bashkëpunimit dhe avancimit të raporteve në Ballkanin Perëndimor. Theksova se mbështetja e Kroacisë duke qenë pjesë e Presidencës së BE-së është shumë e rëndësishme për Kosovën dhe se jemi duke punuar fuqishëm që qytetarët tanë sa më shpejt të bëhen pjesë e familjes europiane, përmes liberalizimit të vizave”, ka thënë Haradinaj.