Kryeministrja e Finlandës, Sanna Marin, ka shprehur mbështetjen për anëtarësimin e Shqipërisë në Bashkimin Evropian (BE).

Gjatë një vizite zyrtare në Tiranë ku është pritur me ceremoni shtetërore nga kryeministri Edi Rama, Marin ka theksuar rëndësinë e integrimit në BE, jo vetëm të Shqipërisë, por të gjitha Ballkanit pasi t’i kenë përmbushur kriteret.

“Finlanda është mbështetëse afatgjate e zgjerimit të Bashkimit Evropian. Duam të shohim të gjitha vendet e Ballkanit Perëndimor të anëtarësohen në BE pasi t’i kenë përmbushur kriteret. Përparësia jonë është të nisim negociatat për anëtarësim me Maqedoninë e Veriut dhe Shqipërinë pa asnjë vonesë. Duam të mbështesim Shqipërinë për anëtarësimin e saj në BE. Shqipëria ka një zë të fortë edhe globalisht. E vlerësojmë rolin tuaj kur bëhet fjalë për përfaqësimet ndërkombëtare”, ka thënë Marin.

Ndërsa kryeministri i Shqipërisë, Edi Rama, ka vlerësuar përpjekjet e Finlandës për të zhbllokuar procesin e hapjes së negociatave.

“Folëm për atë që vjen në ditët e ardhshme apo që nuk vjen, lidhur me çeljen zyrtare të bisedimeve për anëtarësim të Shqipërisë dhe Maqedonisë së Veriut. I thashë kryeministres që nuk pres asgjë të re në këtë këshill, megjithatë deri në fund, BE-ja, vendet evropiane po përpiqen me Bullgarinë për të hapur një shteg të arsyes dhe për ta çliruar procesin”, ka thënë Rama.

Një tjetër diskutim i rëndësishëm ishte edhe lufta e Rusisë në Ukrainë dhe kërkesa e Finlandës, por edhe Suedisë, për t’u anëtarësuar në NATO.

Kryeministri Rama e ka konsideruar të rëndësishëm hyrjen e Finlandës në NATO, si një vlerë të shtuar për këtë aleancë. Jo vetëm kaq, por eksperienca e Finlandës është shprehur Rama, do t’i shërbejë gjithë aleancës ushtarake, por edhe vendeve të Ballkanit që është një “hallkë e dobët”.

“Ne së bashku jemi në një front kundër agresionit rus në Ukrainë dhe Finlanda ka shumë për të treguar dhe mësuar neve dhe të gjithë të tjerëve, pasi për shkak të historisë e njeh shumë mirë agresorin dhe natyrën e tij dhe duke qenë një vend që ka pasur në të shkuarën mundësinë që të nxjerrë shumë mësime nga fqinjësia me Rusinë, mendoj që ka dhe një zë shumë të respektueshëm. Ballkani është një hallkë e dobët delikate dhe për këtë arsye eksperienca dhe fjala e Finlandës ka shumë rëndësi për të gjithë komunitetin. Nga ana tjetër mbështesim me gjithë besimin dhe bindjen tonë anëtarësimin e Finlandës dhe Suedisë në NATO. Bëhet fjalë për dy vende që në çdo aspekt janë vlerë e shtuar e aleancës dhe për më tepër në kushtet e sotme dyert e aleancës duhet të jenë të hapura. Madje ne ndihemi të privilegjuar që na jepet mundësia të bëjmë një gjë për Finlandën, kjo nuk është pak”, është shprehur Rama, raporton “tvklan.al”.

Edhe kryeministrja finlandeze, ka theksuar rëndësinë e të qenit të bashkuar përballë Rusisë.

“Diskutimi ynë konfirmon vetëm që duhet të bëjmë më shumë së bashku. Një shumicë mbizotëruese e Finlandës e mbështesin anëtarësimin në NATO. Dua t’ju falënderoj për mbështetjen tuaj të fortë për anëtarësimin në NATO. Shqipëria është mbështetëse e vendosur e dyerve të hapura. Ndërkohë që lufta vazhdon është e rëndësishme të deklarojmë se jemi të bashkuar. Finlanda dhe Suedia do ta bëjnë aleancën më të fortë. Na duhet të intensifikojmë mbështetjen ndaj Ukrainës dhe sanksionet ndaj Rusisë”, ka thënë kryeministrja e Finlandës.