Panxhshiri është provinca e fundit afgane në verilindje të Kabulit e cila ende nuk ka rënë në dorën e Talibanit. Atje vepron një forcë kryengritëse e cila po i reziston regjimit të ri, por epërsia talibane në aspektin luftarak pritet ta vërë edhe atë së shpejti nën kontroll.

Talibanët vijojnë edhe të dielën ofensivën e armatosur në vatrën e fundit të rezistencës afgane, në Luginën e Panxhshirit.

Forcat talibane avancuan por mbulimi i territorit me mina ngadalësoi operacionet nga toka.

Raportohet se mbi 700 talibanë janë vranë ditën e shtunë në provincën verilindore të Afganistanit, duke pasur si avantazh malet e shumta të zonës, dhe më shumë se 1 mijë të tjerë u kapën rob ose iu dorëzuan vetë kryengritësve.

Amrullah Saleh, ish-zëvëndespresident i Afganistanit i cili udhëheq tani frontin e rezistencës në rajon deklaroi se sido të vijë situata, ka zgjedhur të japë jetën para se t’i dorëzohet pushtuesve të rinj.

Saleh gjithashtu i ka bërë thirrje OKB-së të ndërhyjë për një zgjidhje politike pasi rajoni i Panxhshirit gjendet përballë krizës humanitare për shkak të bllokadës ekonomike dhe bllokimit të rrjetit të telekomunikimit.

Luftëtarët e Panxshirit i kanë rezistuar regjimit taliban edhe në vitet 1996-2001 kur morën pushtetin për herë të parë dhe kanë luftuar më herët kundër pushtimit sovjetik në vend.

Kryengritësit mësohet se negociuan këto ditë me talibanët por këta të fundit i konsideruan të paarsyeshme kërkesat e rebelëve, që përfshinin 30 për qind pjesëmarrje në qeverinë e re, koordinim për emërimin e zyrtarëve dhe mbajtjen e armatimeve ushtarake që disponojnë.