Si vazhdim i veprimeve të shumta për trajtimin e qenve endacakë, me vendim të kryetarit të Prishtinës, Përparim Rama, ka nisur aksioni për largimin e këtyre kafshëve nga rruga dhe dërgimin e tyre në strehimore të licencuar nga agjencia e veterinës dhe ushqimit, ku do të trajtohen si duhet dhe përgatiten më pas për adoptim.

Nisjen e këtij aksioni e kanë përcjell drejtori për siguri dhe emergjenca, Lulzim Fushtica dhe këshilltarët Bajram Gecaj e Pëllumb Bajçinovci.

“Ky aktivitet do të vazhdojë për ditët në vazhdim. Qëllimi është që qentë të largohen nga rruga dhe të vendosen në strehimore të licencuar nga AVUK-u, ku do të trajtohen në mënyrë humane, dhe komuna do të vazhdojë të subvencionojë këtë strehimore për qentë që do t’i mbajë, ku do t’i përgatisim edhe për adoptim”, ka thënë Fushtica.

Komuna e Prishtinës po ashtu është duke e përgatitur rregulloren për trajtimin e qeneve endacak, ku përfshihet edhe mënyra se si mund të adoptohet një qen i tillë, të cilin do ta trajtojë falas në çfarëdo kohe veterinari i kryeqytetit në qendrën për trajtimin e tyre e cila gjendet në Hajvali të Prishtinës dhe do të hapet së shpejti.

“Do t’i subvencionojmë edhe qytetarët që janë të interesuar të adoptojnë qentë. Një person që e merr një qen do të subvenciohohet me 50 euro në muaj. Qytetarët mund t’i marrin deri në pesë qenë”, ka deklaruar drejtori për Siguri dhe Emergjenca, Lulzim Fushtica.

Kryeqyteti është duke ndërmarrë veprime të shumta për trajtimin e qeneve endacak, ku deri tani janë ndarë 1 milion e 300 mijë euro.