Drejtori i përgjithshëm i Arkivit Osman të Presidencës së Turqisë, Ugur Ynall, ka vizituar dje Agjencinë Shtetërore të Arkivave të Kosovës (AShAK). Ynall ishte i shoqëruar nga zëvendësambasadorja e Turqisë në Republikën e Kosovës, Dilara Çelik.

Ynall dhe Çelik kanë biseduar me kryeshefin e AShAK-ut, Bedri Zyberaj, për bashkëpunimin e mirë të arkivave të Turqisë me ato të Kosovës si dhe për mundësitë e bashkëpunimit dhe të aftësimit edhe më tutje të stafit profesional të kësaj agjencie.

Pas vizitës së drejtorit Ynall në AShAK, Zyberaj i ka dërguar mysafirët për vizitë në Prekaz. Për Ynall kjo ishte vizita e parë në Kompleksin “Adem Jashari”. Ai, sipas Zyberajt, është tronditur pas historisë që i është rrëfyer për familjen Jashari. “Do ta ruaj kujtim të përhershëm këtë që pashë sot!” – ka thënë Ynall.

Pas Prekazit, mysafirët kanë vizituar objekte të kultit fetar në Prizren (xhaminë e Sinan Pashës dhe të tjera) dhe kompleksin e Lidhjes Shqiptare të Prizrenit.