Komisioni për Mbikëqyrjen e Financave Publike ka shqyrtuar të martën raportin vjetor financiar për vitin 2019 për Postën e Kosovës, ku Zyra Kombëtare e Auditimit për këtë ndërmarrje ka dhënë opinion të kundërt që nënkupton se pasqyrat financiare nuk paraqesin një pamje të drejtë dhe të vërtetë të pozitës financiare.

Kryesuesi i Bordit të Postës së Kosovës, Leonard Shabanaj, ka thënë se humbjet milionëshe në këtë ndërmarrje janë evidente, derisa është ankuar për gjendjen në të cilën ndodhen objektet e Postës.

“Borxhe të grumbulluara për vite dhe me pakënaqësi në të gjithë sektorët. Objektet e postës janë në gjendje të tmerrshme. Modernizimi i postës ka mbetur larg me vite. Humbjet milionëshe janë evidente”, ka thënë ai.

Ndërsa ushtruesi i detyrës së kryeshefit ekzekutiv në këtë ndërmarrje, Xhevdet Smakiqi, ka thënë se kanë marrë masa për të adresuar gjetjet e ZKA-së për 2019.

“Bordi dhe menaxhmenti ka ndërmarrë masa menjëherë për zbatimin e rekomandimeve. Disa janë zbatuar disa janë në proces”, ka thënë Smakiqi.

Më tutje, kryesuesi i Bordit të Postës së Kosovës, Leonard Shabanaj, nga deputetët është pyetur mbi kriteret për përzgjedhjen e ushtruesit të detyrës së kryeshefit dhe zëvendësit të tij.

“Jemi detyruar të gjejmë një ushtrues detyre. Lidhur me procedurën, kemi shikuar CV-të e të gjithëve dhe kemi menduar që Smakiqi i ka plotësuar kushtet, e njëjta edhe me zëvendëskryeshefin”, ka thënë ai.

Kryetari i Komisionit për Mbikëqyrjen e Financave Publike, Bedri Hamza, ka thënë se është shqetësuese numri i madh i rekomandimeve për vitin 2019 dhe gjendja në të gjitha ndërmarrjet publike.

“Është rast shqetësues gjendja jo e mirë në të gjitha ndërmarrjet publike, përjashtim në disa kompani. Humbjen e vazhdueshme nuk mund ta përballojë dhe pothuajse të gjitha ndërmarrjet kanë ardhur në një situatë ku kërkojnë subvencionim. Më shqetësoi numri i madh i rekomandimeve të vitit 2019”, ka thënë Hamza.

Hamza ka kërkuar që sa më shpejt qeveria të emërojë bordin e drejtorëve, në mënyrë që pastaj të bëhet emërimi i kryeshefit ekzekutiv.

Sipas tij, mbajtja e pozitave me borde të përkohshme dhe me ushtrues detyre nuk mund të ndryshojë gjendjen aktuale në këtë ndërmarrje publike.

Kurse deputetja e LDK-së, Besa Gaxherri, ka thënë se gjendja në Postën e Kosovës është më e keqe sesa paraqitet.

“Është fat i keq që kjo kompani ka ardhur duke u degraduar e jo duke hyrë në funksion resurset e saj”, ka thënë Gaxherri, duke shtuar se nëse nuk ndërmerren masa imediate, Posta dhe Telekomi i Kosovës shumë shpejt mund të falimentojnë.