Kryetari i Komunës së Gjilanit, Alban Hyseni, me bashkëpunëtorët ka vizituar punimet e asfaltimit të rrugëve në fshatin Nasalë dhe të segmentit të rrugës “15 Qershori” në lagjen Dardania.

Ai  gjatë vizitës së punimeve në Nasalë, ka thënë se me asfaltimin e këtyre rrugëve atje, po e përmbyllin pjesën e projektimit dhe të asfaltimit të rrugëve përbrenda shtëpive dhe lagjeve të fshatit.

“Është projekt i cili është pritur gjatë, ndoshta më shumë se 20 vite. Sot është bërë asfaltimi i njërës prej tri pjesëve kryesore të rrugëve, ndërkohë që janë asfaltuar edhe rrugicat. Janë diku 1100 metër gjatësi të asfaltit e me gjerësi prej katër metra dhe në këtë formë fshatin Nasalë po e përmbyllim me pjesën e projektimit dhe të asfaltimit të rrugëve përbrenda shtëpive dhe lagjeve të fshatit. Është një praktikë e një qasje e re ku nuk premtojmë por vetëm punojmë dhe angazhohemi maksimalisht. I falënderoj banorët për pritjen dhe për durimin që e kanë pasur deri tash”, ka thënë Hyseni.

Drejtori i Shërbimeve Publike, Mentor Mihovci, ka thënë se pas përfundimit të asfaltimit të segmentit të rrugës nga furra “Aroma” e deri te shkolla “Selami Hallaqi”, do të bëhet shënjëzimi horizontal dhe vertikal, ndërkaq parkingjet do të kthehen në formë të drejt.