Kryetari i Komunës së Vushtrrisë, Xhafer Tahiri, ka bërë me dije se ka marrë vendim që secili qytetar që do të lajmërojë keqpërdorimin e pozitës zyrtare dhe korrupsionin e mundshëm të zyrtarëve komunal do të shpërblehet me shumën prej 5.000 euro.

“Qeverisja me duar të pastra është prioriteti më i lartë i yni”, ka shkruar Tahiri në llogarinë e vet në “Facebook”.

Postimi i plotë i tij:

Komuna e Vushtrrisë ka miratuar Kodin e etikës për zyrtarët e Komunës së Vushtrrisë, si dhe Librin e proceseve për menaxhimin e parasë publike të Komunës së Vushtrrisë. Kështu, Vushtrria bëhet Komuna e parë në Kosovë që aprovon këto dy dokumente të rëndësishme që rrisin transparencën e llogaridhënien. 

Në procesin e hartimit të këtyre dy dokumenteve të rëndësishme, Komuna e Vushtrrisë është përkrahur nga USAID-i në kuadër të Projektit TEAM. 

Sot, po ashtu kam marrë vendim që secili qytetar që do të lajmërojë keqpërdorimin e pozitës zyrtare dhe korrupsionin e mundshëm të zyrtarëve komunal do të shpërblehet me shumën prej pesëmijë euro (5.000 €).

Qeverisja me duar të pastra është prioriteti më i lartë i yni.