Fuqitë perëndimore reaguan me shpejtësi ndaj vendimit të së hënës nga presidenti rus Vladimir Putin për të njohur pavarësinë e dy republikave të vetëshpallura në Ukrainën lindore dhe një dislokim të trupave në rajon, duke dënuar Moskën dhe duke bërë thirrje për sanksione.

Shtetet e Bashkuara dhe aleatët e saj sulmuan Rusinë gjatë një sesioni urgjent të Këshillit të Sigurimit të hënën, duke denoncuar njohjen nga Vladimir Putin të zonave të kontrolluara nga rebelët në Ukrainë dhe vendosjen e trupave si një shkelje e rëndë e ligjit ndërkombëtar dhe “pretekst për luftë”.

Duke iu drejtuar seancës, ambasadorja e SHBA Linda Thomas-Greenfield përçmoi pohimin e Putinit se trupat ruse do të merrnin një rol paqeruajtës në zonat Donetsk dhe Lugansk.

“Ai i quan ata paqeruajtës. Kjo është marrëzi. Ne e dimë se çfarë janë ata në të vërtetë”, ka thënë Thomas-Greenfield.

Ndërsa ambasadori i Ukrainës, Sergiy Kyslytsya këmbënguli që kufijtë e vendit të tij mbeten “të pandryshueshëm” pavarësisht veprimeve të Rusisë, shkruan France24, përcjell Telegrafi.

Ndërkohë Shtetet e Bashkuara thanë të hënën se po dërgonin të gjithë diplomatët e saj në Ukrainë në Poloni për shkak të frikës së sigurisë.

Pak orë më parë, udhëheqësi i Kremlinit njohu pavarësinë e dy zonave të kontrolluara nga rebelët në zonat Donetsk dhe Lugansk të Ukrainës. Më pas ai udhëzoi ministrinë e tij të mbrojtjes të merrte një rol “paqeruajtës” në rajonet separatiste.

“Sot Departamenti i Shtetit po merr përsëri veprime për sigurinë e qytetarëve amerikanë, duke përfshirë personelin tonë. Për arsye sigurie, personeli i Departamentit të Shtetit aktualisht në Lviv do të kalojë natën në Poloni”, ka thënë Sekretari i Shtetit, Antony Blinken në një deklaratë.

Një reagim rreth zhvillimeve të fundit atje ka ardhur edhe nga presidenti ukrainas Volodymyr Zelensky.

Ai akuzoi Rusinë për prishjen e bisedimeve të paqes dhe përjashtoi mundësinë e bërjes së ndonjë lëshimi territorial në një fjalim drejtuar kombit në orët e para të mëngjesit të së martës.

Zelensky tha se Ukraina ishte e përkushtuar ndaj paqes dhe diplomacisë pasi Rusia njohu zyrtarisht dy rajone separatiste të mbështetura nga Rusia si të pavarura të hënën në mbrëmje.