![](https://www.epokaere.com/wp-content/uploads/2021/03/luzha.jpg)
KTHIMI
11 mars 2021
| 15:56
ELIFE LUZHA
Me rreze yjesh rimova këngën time
Viteve të zehërta degdisur në mërgim
Ankthin e rënies ndjerë e kam gjer në rrënjë
Rrathëve të ajrit ngulfatur me durim
Dhe ja tek jam tani përballë teje malli im
Guri i sertë i pritjes para kumtit hesht
Peshë e halleve tua shpresën ma gurëzon
Djallëzitë kthinave danteske gjarpërojnë
Ti balldiell shndrit në rrugëtim me parzëm mprehur
Mijëra vjet logjeve dardane lumit gjakut jemi rritur
Heu Kosovë këngë e paepur përjetësie ta puthi ballin
Je bardhësi e agut ajër që frymon shqim dejve të mi