Rikthimi i tij në Formula 1 u prit me shumë bujë, por pas vetëm një sezoni Robert Kubica do të largohet nga makina Williams.

Piloti polak gjatë konferencës për shtyp në Singapor, ku të dielën zhvillohet gara e radhës e botërorit, dha lajmin e divorcit nga makina britanike.

“Nuk do të vazhdoj me Williamsin sezonin tjetër. Do të ndalem dhe do të shoh për mundësi të tjera që do të kem, në disiplina të tjera. Mu desh shumë energji e vullnet që të rikthehesha në Formula 1 dhe objektivi im ishte të qëndroja, por jo me çdo kusht”, ka thënë Kubica. “Dua të bëj diçka që të më japë kënaqësinë e garës dhe ky sezon ishte shumë i vështirë si nga ana e rezultateve ashtu dhe nga ana fizike. Falënderoj skuadrën për mundësinë që më dha, por mendoj se mora vendimin e duhur”, ka shtuar Kubica, që u rikthye në Formula 1 pas 7 vjetësh, por pa sukses.