Një aksion simbolik është mbajtur sot para Kuvendit të Kosovës.

Përmes këtij aksioni, është kundërshtuar heqja e emrit të Hasan Prishtinës, nga Universiteti i Prishtinës.

Mehmet Prishtina, drejtor i Fonacionit “Hasan Prishtina” njëherësh stërnipi i heroit kombëtar tha se heqja e emrit të tij po bëhet me kërkesa të paarsyeshme, të pa baza dhe ilegale me të cilën duhet të merret prokuroria.

“Kjo nismë e keqe ka filluar që një vit dhe kjo ka më shumë karakter politik. Në paaftësi për t’i zgjedhur problemet politike, këta sulmojnë figurat. Heqja e emrit të tij po bëhet me kërkesa të paarsyeshme, të pa baza dhe ilegale me të cilën duhet të merret prokuroria”, ka thënë ai.

Heqja e këtij emri po kundërshtohet edhe nga Parlamenti Studentor.

“Ne e kundërshtojmë këtë nismë. Ne kemi përdorur mekanizma, protesta dhe peticione. Sot ju kemi bashkuar kësaj nismë për t’u solidarizuar”, ka thënë kryetari Florend Ramusa.