Në të dy propozimet e fundit që Lëvizja Vetëvendosje dhe Lidhja Demokratike e Kosovës i kanë bërë njëra-tjetrës për bashkëqeverisje, parashihet që Ministria e Kulturës, Rinisë dhe Sportit (MKRS), të mos jetë ministri e veçantë.

Lëvizja Vetëvendosje në propozimin e saj parasheh që kjo ministri të ndahet, ku kultura dhe rinia i bashkohen Ministrisë së Arsimit, Shkencës dhe Teknologjisë, kurse sporti i bashkëngjitet Ministrisë së Shëndetësisë.

Ndërsa LDK-ja parasheh që Ministria e Kulturës, Rinisë dhe Sportit t’i bashkohet Ministrisë së Arsimit, Shkencës dhe Teknologjisë.

Të dy këto propozime janë duke u konsideruar si absurde dhe që shpërfaqin joseriozitet të këtyre dy partive karshi shëndetësisë, kulturës, rinisë dhe sportit.

Bashkimi i sportit me Ministrinë e Shëndetësisë, për Blerim Sylën, kryetar i Federatës Sindikale të Shëndetësisë, do të ndikojë negativisht në funksionimin e Ministrisë së Shëndetësisë.

Ai ka thënë se është e çuditshme se si është menduar që dy fusha krejt të ndryshme të bashkohen në një ministri të vetme.

Funksionimin e shëndetësisë me sportin, ai e ka parë si të pamundur, derisa ka theksuar se shëndetësia ka shumë probleme me të cilat duhet të merret ministri i ardhshëm, e derisa do të jetë edhe sporti gjërat do të komplikohen.

Syla ka thënë se edhe sporti është në kulmin e sukseseve, e bashkimi me një ministri si shëndetësia që është e shumë probleme do ta lë në hije.

Madje, ai nuk e ka përjashtuar mundësinë që të dështohet në të dyja fushat nëse veç ndodhë një bashkim i tillë.

Kundër një bashkimi të tillë është edhe kryetari i Shoqatës së të Drejtave të Pacientëve në Kosovë, Besim Kodra, i cili përmes një përgjigje me shkrim ka thënë se duke qenë shëndetësia më shumë probleme bashkimi me një sektor tjetër vetëm sa do ta vështirësonte gjendjen e saj.

Sipas tij, bashkimi i Ministrisë së Shëndetësisë me atë të Sportit, duke anashkaluar një sektor të afërt siç është mirëqenia sociale nuk do t’i ndihmojë sektorit të shëndetësisë, por vetëm do të vështirëson punën e tij.

Ndarjen ose shkrirjen e Ministrisë së Kulturës, Rinisë dhe Sportit e sheh si të gabuar edhe analisti i futbollit Ardian Llumnica, i cili për “Kosovapress”, ka thënë se është për keqardhje diskutimi për bëhet për këtë ministri.

Në anën tjetër, Jeta Krasniqi nga KDI-ja, ka thënë se ndarja e ministrive duhet të bëhet në bazë të programit qeverisës.