Kryeministri Albin Kurti ka bërë sot homazhe për viktimat e masakrës në Rezallë.

“Në Rezallë të Drenicës të njoma janë lulet dhe kujtimet. Të hapura janë plagët për të vrarët dhe varret për të zhdukurit me dhunë gjatë luftës. Në përvjetorin e 26-të bëmë homazhe për viktimat e masakrës në Rezallë. Nderuam kujtimin për 98 burrat dhe djemtë e rinj që u pushkatuan nga forcat e armatosura të Serbisë. Nga kjo masakër, vetëm tre shpëtuan të gjallë”.

“Në përpjekje të zhdukjes së krimit, pasi ua morën jetën me ekzekutim mizor, forcat serbe ua vodhën kufomat. Disa u gjetën të groposur në varreza masive në Kizhevak dhe në Rudnicë të Rashkës, në Serbi Sot nderojmë kujtimin e të vrarëve dhe të zhdukurve me dhunë në Rezallë. Përkujtojmë masakrat e kryera në javën e parë të prillit 1999 në Lybeniq të Pejës, në Çabrat të Gjakovës, në Fushë Kosovë, në Sopi të Suharekës, masakrën e tmerrshme mbi familjen Vejsa në Gjakovë, masakrën në Llovcë të Gjilanit dhe Kralan të Klinës”, ka shkruar Kurti në “Facebook”.

Ai ka thënë se përkujtimi ynë është dëshmi e përkushtimit për të mos harruar kurrë sakrificat për të shtrenjtën e shenjtën liri.

“I përjetshëm qoftë kujtimi i martirëve dhe dëshmorëve të kombit!”, ka shkruar Kurti.