Kryeministri i Kosovës, Albin Kurti, ka biseduar të enjten me të dërguarin special të Gjermanisë për Ballkanin Perëndimor, Manuel Sarrazin.

Kurti ka thënë se vazhdon të jetë konstruktiv, kreativ dhe i përkushtuar ndaj dialogut të hapur dhe thelbësor drejt një marrëveshjeje për normalizimin e plotë të marrëdhënieve me Serbinë.

“Në prag të takimit të radhës të nivelit të lartë në Ohër, bisedova me të dërguarin special Manuel Sarrazin. Ne vazhdojmë të jemi konstruktiv, kreativ dhe të përkushtuar ndaj dialogut të hapur dhe thelbësor drejt një marrëveshjeje për normalizimin e plotë të marrëdhënieve. E falënderova për rolin dhe mbështetjen e vazhdueshme”, ka shkruar Kurti në “Twitter”.

Kujtojmë se më 18 mars do të zhvillohet një takim i lartë në Ohër ndërmjet kryeministrit të Kosovës Albin Kurti dhe presidentit të Serbisë Aleksandër Vuçiq.