Kryeministri Albin Kurti, ka vazhduar agjendën e tij në Irlandën e Veriut, ku është takuar me kryetarin e Parlamentit të këtij shteti, Edwin Poots.

Në njoftimin për medie është thënë se në takim ata kanë folur mbi historinë dhe përvojat respektive, veçanërisht në ballafaqimin me të kaluarën e dhimbshme të luftës.

Poots ka folur për mësimet e nxjerra nga përvoja e Irlandës Veriore në përkujtimin e viktimave.

“U theksua roli i rëndësisë që kanë muzetë për të përkujtuar çdo jetë të humbur. Me atë rast, kryeministri Kurti përmendi nismën e Ministrisë së Kulturës, Rinisë dhe Sportit, për themelimin e Muzeut të Luftës, që në qendër do të ketë dokumentimin dhe prezantimin e krimeve të ish-Jugosllavisë dhe Serbisë ndaj shqiptarëve në Kosovë. Më tej, përmendi po ashtu edhe themelimin e Institutit për dokumentimin e krimeve të kryera gjatë luftës në Kosovë”, është thënë në njoftim.

Sipas këtij njoftimi, Kurti e ka falënderuar Poots për mikpritjen dhe bisedën e sinqertë. Prezent në këtë takim ishin dhe zëvendësministrja e Punëve të Jashtme dhe Diasporës, Liza Gashi, ambasadori i Kosovës në Mbretërinë e Bashkuar, Ilir Kapiti dhe ambasadori Nicholas Abbott.