Gazeta e famshme britanike “The Guardian” i ka kushtuar një shkrim kryetarit të Lëvizjes Vetëvendosjes Albin Kurti dhe ushtrueses së detyrës së presidentes Vjosa Osmani.

Në shkrimin e autorit Patrick Wintour, Kurti dhe Osmani kanë deklaruar se një aleancë e re është e nevojshme për luftimin e korrupsionit.

Më tutje, autori ka përmendur faktin se të dy edhe pse vijnë nga parti të ndryshme renditen të parët në sondazhe.

Në artikull, po ashtu është shkruar se për herë të parë pas shpalljes së pavarësisë këta mund të fitojnë shumicën në Kuvend.

Një pjesë e këtij shkrimi tregon për historikun e Albin Kurtit dhe Vjosa Osmanit.

Kurti që është bërë i njohur nga aktivitetet studentore kundër regjimit të Sllobodan Millosheviqit, ndërsa Osmani ka marrë pozitën e të parës së shtetit pas dorëheqjes së Hashim Thaçit.

Në këtë intervistë ushtruesja e detyrës së presidentes Vjosa Osmani, ka thënë se korrupsioni ka krijuar një mur të madh, dhe për ta thyer duhet të bashkohen forcat.

“Pengesa më e madhe para nesh është ky mur i madh i krimit dhe korrupsionit ndër vite. Në mënyrë që ta shkatërrojmë ne duhet të bashkojmë forcat. Ne mund të kemi pasur dallime në të kaluarën, por ajo që na ka sjellë së bashku është diçka shumë më e fortë dhe që po lufton armikun kryesor të brendshëm të vendit tonë, kapjen e shtetit. Nuk është se na mungojnë institucionet për të luftuar korrupsionin, por ishte vullneti politik. Sapo politikanët e nivelit të lartë të jenë të korruptuar, ai depërton nëpër sistem”, ka thënë ajo.

Osmani ka thënë se votuesit nuk janë të interesuar për premtime elektorale e ideologji.

Ndërsa lideri i LV-së, Albin Kurti, ka thënë se korrupsioni i madh në vendin tonë, është i përqendruar në krye.

Kurti ka thënë se mungesa e sundimit të ligjit po i pengon investitorët.

“Shakaja në Kosovë është pse makiatot janë kaq të mira dhe përgjigjja është sepse ato bëhen nga ata me master në sociologji. Pranimet nga diaspora arrijnë 1.5 miliardë euro në vit kur buxheti i shtetit është 2.5 miliardë euro”, ka thënë Kurti.

Të dy kandidatët kanë mirëpritur njohjen nga Izraeli, por duket se janë të gatshëm të dëgjojnë Uashingtonin për çështjen e Ambasadës.

Kurti ka thënë: “Unë nuk mendoj se mund të përballojmë më shumë mosmarrëveshje midis Uashingtonit dhe Brukselit kur bëhet fjalë për Ballkanin. Nëse ka kontradikta, super fuqitë e tjera si Rusia do të përfshihen”.