Kryetari i Lëvizjes Vetëvendosje, njëherësh kryeministër i vendit, Albin Kurti, bashkë me kandidatët për deputet për zgjedhjet në Shqipëri, Boiken Abazi, Iliaz Shehu dhe Kreshnik Merxhani, ka marrë pjesë në një takim me komunitetin shqiptar në Itali.

Kurti përmes një postimi në llogarinë e vet në “Facebook” ka shkruar se komuniteti shqiptar në Itali, i cili është bukur i madh e i integruar, përkujton këtë vit 30-vjetorin e eksodit të madh prej Shqipërisë, drejt brigjeve të Pulias në Itali.

“Kjo përkon me fillimin e tranzicionit shqiptar i cili tashmë është bërë sistemik dhe duhet të kryhet. Por forcat e politikat që përfitojnë nga tranzicioni, nuk mund ta përfundojnë atë”

“Në këto tri dekada diaspora ka kontribuar aktivisht dhe masivisht në ekonominë e vendeve tona, madje ajo e ka ruajtur paqen sociale gjatë krizave ekonomike të vendeve tona, e megjithatë nuk ka pasur vëmendjen e merituar nga institucionet”, ka shkruar Kurti.

Ai ka theksuar se shqiptarët në Itali janë një faktor përcaktues për marrëdhëniet e dy vendeve.

“Si Qeveri e Kosovës bashkë me LV-në në Kosovë dhe Shqipëri, angazhohemi së bashku që mërgata ta ketë përkrahjen që meriton, për të rritur edhe më tej kontributin e saj jetik për zhvillimin e kombit tonë. Për këtë arsye bashkë me Boikenin, Iliazin dhe Kreshnikun zhvilluam këtë takim për t’u njohur më mirë me nevojat e komunitetit tonë në Itali i cili përbëhet prej më shumë se gjysmë milioni personash. Shqiptarët e Italisë pretendojnë me të drejtë një rol më aktiv në politikëbërje”, ka thënë Kurti.

Po ashtu, ai ka bërë me dije se diskutuan edhe për nevojën e hartimit të strategjive të përbashkëta mbi parandalimin e ikjes së të rinjve, thithjes së kapitalit human, njohjen e kontributeve shoqërore, vlerësimit të trashëgimisë kulturore në funksion të rritjes ekonomike si dhe rolit të arsimimit dhe gruas në shoqëri.

“Ky qe një hap i rëndësishëm dhe gjithëpërfshirës, që dëshmon se si vullneti ndryshon rrethanat e që na sheh edhe njëherë të bashkuar përtej kufijve të imponuar. Me qeverinë e re në Prishtinë e me ngritjen e Lëvizjes në Shqipëri, këso takimesh do të shndërrohen në praktika të zakonshme për të afruar dhe mobilizuar edhe më tej bashkëkombasit tanë jashtë vendlindjes”, ka shkruar kryeministri Kurti.