Kryeministri i Kosovës, Albin Kurti, ka thënë se ekziston një rrezik i lartë për një konflikt të ri mes Kosovës dhe Serbisë.

Ai në një intervistë për gazetën italiane “La Republicca”, ka thënë se ky rrezik është rritur pas sulmit të Rusisë mbi Ukrainën.

“Rreziku i një konflikti të ri ndërmjet Kosovës dhe Serbisë është i lartë. Do të isha i papërgjegjshëm nëse do të thoja të kundërtën, veçanërisht pasi bota ka parë se çfarë ka bërë Rusia mbi Ukrainën”, ka thënë Kurti.

Kurti ka thënë se ky rrezik është më i vogël pasi  në Kosovë praninë e saj e ka NATO-ja.

“Nuk dua të them shumë i lartë, sepse ne kemi NATO-n këtu, por i lartë. Ne jemi një demokraci në kufi me një autokraci, në fund të fundit. Para pushtimit të Ukrainës mundësitë ishin të pakta, tani situata ka ndryshuar. Episodi i parë, pasojë e idesë fashiste të pansllavizmit që ka Kremlini, ishte Ukraina. Nëse kemi një episod të dytë, për shembull në Transnistria, atëherë gjasat që një luftë e tretë të zhvillohet në Ballkanin Perëndimor, dhe në Kosovë në veçanti, ato do të jenë shumë të larta”, ka thënë Kurti.