Lëvizja Vetëvendosje ka organizuar një tryezë me rastin e 75-vjetorit të konferencës së Bujanit, e cila ishte mbajtur më 31 dhjetor 1943, në kullën e Sali Manit, në Bujan të Tropojës, konkretisht në Malësi të Gjakovës.

Lideri i kësaj lëvizje, Albin Kurti, ka deklaruar se konferenca e Bujanit ka qenë një konferencë e gjerë e frontit antifashist të Kosovës, dhe në të cilën kanë marrë pjesë përfaqësues të të gjitha shtresave e krahinave të Kosovës.

Ai ka thënë se kjo konferencë është tejet e vlefshme si moment i rëndësishëm i Republikës së Kosovës.

“Kjo konferencë, edhe pse thuajse është heshtur në diskutimet e sotme, dhe nuk njihet mjaft nga qytetarët, është tejet e vlefshme, si një nga momentet e rëndësishme kur populli i Kosovës, ndërkohë që rreshtohej kundër fashizmit si shumë popuj të tjerë të botës, në të njëjtën kohë, afirmonte të drejtën e vet për vetëvendosje, dhe dëshirën e vet të kahershme e të vazhdueshme për t’u bashkuar me Shqipërinë. Rezoluta e Bujanit, e cila i përmban pikërisht këto shprehje, u votua prej të gjithë pjesëmarrësve, përfshi edhe atyre serbë e malazezë.”