Kryeministri Albin Kurti pas takimit që ka mbajtur me Këshillin Grevist, ka thënë se janë zhvilluar shumë takime me

Këshillin Grevist dhe se kërkesë e tyre ka qenë Projektligji i pagave.

Kurti gjatë një konference për medie ka bërë me dije se Rrahman Jasharaj i ka thënë “ndihmom si vëlla”.

Ai ka thënë se duhet një zgjidhje më universale për këtë çështje.

“Si vëlla të ndihmoj privatisht, jo si kryeministër. Kryeministri nuk bën pazare”, ka thënë Kurti.

Kryeministri tregoi në detaje për ofertën që ua kishte bërë në takim Këshillit Grevist.

“Neve na u tha në takim që për këtë ofertë të qeverisë do të pyetet anëtarësia. Por sapo dolën nga takimi u deklaruan për medie se greva vazhdon. Kur e pyetën anëtarësinë? Neve na thanë në takim që do ta pyesin anëtarësinë. Oferta shtesë ishte kjo: Do të jenë pjese përmbajtësore e diskutimeve publike për ligjin mbi pagat. Ne atyre ua dhamë lajmin të parët se këtë javë do të fillojë diskutimi publik. Ndërkaq dy çështjet e tjerat ishin që bashkërisht me BSPK-në do ta bëjmë reformën e sistemit pensional në mënyrë që të bëjmë diferencimin e kategorive të ndryshme duke e hequr atë pragun famëkeqe prej 15 vjet përvojë pune. Dhe tjera, u zotuam që te barnat esenciale do të shtohen edhe 10 milionë euro. Ata thanë se do të konsultohen me anëtarësinë kur dolën nga takimi thanë se vazhdon greva”, ka thënë kryeministri në konferencën për medie, ku ishte i shoqëruar edhe nga ministri i Financave, Hekuran Murati dhe ministrja e Arsimit, Arbërie Nagavci.

Ai ka thënë se në projektligjin për Pagat, mësimdhënësit do ta kenë koficentin më të lartë ndonjëherë.

Kurti u ka bërë thirrje mësimdhënësve që të kthehen në shkolla.