Kryeministri i Kosovës, Albin Kurti ka pritur në takim shefin e Zyrës Ndërlidhëse të Sllovakisë në Kosovë, Rastislav Kostilnik, nga i cili ka kërkuar që vendi i tij ta njoh Kosovën.

Sipas njoftimit të Zyrës së Kryeministri, Kurti e ka falënderuar diplomatin sllovak për mbështetjen që Sllovakia ka dhënë në liberalizimin e vizave për Kosovën.

“Kryeministri Kurti e falënderoi z. Kostilnik për vizitën dhe për mbështetjen në liberalizimin e vizave për Kosovën dhe i bëri thirrje Sllovakisë që ta shtyjë përpara këtë vendim sa më shpejtë për qytetarët e Kosovës. Po ashtu kryeministri Kurti shprehu interesimin për zgjerimin e thellimin e bashkëpunimit bilateral mes dy vendeve dhe i kërkoi Sllovakisë që t’i bashkohet grupit të BE-së që e njeh Kosovën”, është thënë në njoftimin e Zyrës së Kryeministrit.

Kurti ka mirëpritur interesimin e Sllovakisë për dialogun me Serbinë, duke theksuar se ai duhet të jetë i mirëpërgatitur.

“Ai theksoi edhe faktin që Sllovakia si vend anëtar i NATO-s dhe i BE-së mund të mbështesë dhe të shtyjë përpara anëtarësimin e Kosovës në aleancën veri-atlantike, si dhe kërkoi mbështetjen për anëtarësim në organizata ndërkombëtare. Shefi i Zyrës Ndërlidhëse të Republikës së Sllovakisë në Kosovë, Kostilnik, falënderoi kryeministrin Kurti për pritjen dhe shprehu vullnetin për vazhdim të bashkëpunimit bilateral. Ai theksoi gatishmërinë e Sllovakisë për mbështetje në fushën e sundimit të ligjit dhe të ekonomisë”, është thënë në njoftimin e Kryeministrisë.