Kryeministri i Kosovës, Albin Kurti do të marrë pjesë në Forumin e Paqes në Paris. Pjesëmarrjen e të parit të vendit në këtë forum që do të mbahet të enjten dhe të premten në Paris e që do të jenë rreth 450 pjesëmarrës, e ka konfirmuar zëdhënësi i Qeverisë së Kosovës, Përparim Kryeziu.

Ndërkohë që  Kosova nuk është ftuar në Samitin për Demokraci, samit ky i cili do të mbahet për herë të parë në ShBA.

Nga Ambasada e Shteteve të Bashkuara të Amerikës (ShBA) në Kosovë kanë treguar të premten e javës së kaluar  se pse Kosova, Bosnja dhe Hercegovina, dhe Serbia mbetën jashtë Samitit për Demokraci.

“Samiti për Demokraci i presidentit është një nga shumë nismat amerikane e fokusuar në avancimin e demokracisë, luftimit të korrupsionit dhe promovimit e respektimit të të drejtave të njeriut anë e mbanë botës. Jo të gjithë partnerët mund të akomodohen në këtë nismë” është thënë në përgjigjen e ambasadës amerikane.

Megjithëkëtë nga ambasada është thënë se ShBA-ja do të punojë me Kosovën në forme të tjera për të avancuar  dhe fuqizuar demokracinë, parandaluar  rrëshqitjen demokratike, promovuar respektimin e t ë drejtave të njeriut dhe për të luftuar korrupsionin./kosovapress/