Albin Kurti, kryeministër i Kosovës, ka shkruar në Twitter për ndikimin që strukturat paralele serbe në Veri kanë në humbjen e miliona eurove për Kosovën.

Këto humbje janë rrjedhojë edhe e nxitjes së strukturave paralele që qytetarët serbë në Veri të mos paguajnë fatura të energjisë elektrike dhe ujit.

”Strukturat paralele të kontrolluara nga Serbia në komunat veriore të Kosovës u kanë kushtuar qytetarëve dhe taksapaguesve në pjesën tjetër të vendit 320 milionë euro në faturat e papaguara të energjisë dhe 17 milionë euro në faturat e furnizimit me ujë që nga viti 1999”, ka shkruar Kurti ndër tjerash në Twitter, të dielën.

Ai po ashtu ka thënë se “strukturat paralele nuk lejojnë faturimin e energjisë elektrike dhe pengojnë zbatimin e një marrëveshjeje energjetike të arritur në dialogun e 10 viteve më parë. Pa nxitje për të kursyer, konsumi në këto bashki u rrit me 70+% në një dekadë, pjesërisht për shkak të kultivimit të drogës dhe kriptominimit”.

”Që nga viti ’99, Kosova ka humbur edhe 300+ milion euro për shkak të veprimeve të Serbisë, si mbajtja e tarifave të transmisionit dhe detyrimi i tregtarëve që t’i paguajnë TVSH-në Serbisë për tregtinë tonë të energjisë elektrike. Edhe tani, refuzimi i Beogradit për të lejuar tregtinë në Kosovë-Serbi i kushton Kosovës deri në 10 milionë euro në muaj”, ka deklaruar kryeministri i Kosovës.

Kurti thotë se qytetarët në Veri nuk kanë faj për këto ndodhi, por gishtin e drejtgon kah strukturat paralele.

”Sigurisht që për këto padrejtësi nuk kanë faj qytetarët tanë në komunat veriore. Ata e kuptojnë dhe pranojnë se pagesa për shërbimet bazë si energjia elektrike dhe uji është normale dhe se kjo do të mundësonte investimet e nevojshme për të përmirësuar më tej cilësinë e shërbimeve”.

”Ata kanë të drejtë të kenë akses në shërbime të tilla dhe të jetojnë të lirë nga krimi i organizuar, presioni dhe kërcënimet nga strukturat ilegale të udhëhequra nga Serbia. Qeveria ime është e përkushtuar për të përmirësuar cilësinë e jetës së të gjithë qytetarëve të Kosovës dhe për t’u ofruar atyre lirinë, sigurinë dhe sigurinë që meritojnë”, ka thënë ndër tjerash ai.